पालघर दर्पण: वार्ताहर
वाडा: माजी मंत्री विष्णु रामा सवरा यांचे बुधवारी रात्री वयाच्या 72 वर्मा वर्षी दिर्घ आजाराने निधन झाले. आज गुरुवारी दुपारी त्यांच्या अंत्ययात्रेला विधानसभेचे विरोधी पक्षनेते देवेंद्र फडणवीस यांच्यासह राजकीय क्षेत्रातील अनेक मान्यवर उपस्थित होते.
चिंतामण वनगा नंतर आम्ही पालघर जिल्ह्यातील विष्णु सवरा या एका चांगल्या नेत्याला मुकलो असल्याचे देवेंद्र फडणवीस यांनी सवरा यांच्या पार्थिवाचे अंतीम दर्शन घेतल्यानंतर श्रद्धांजली अर्पण करताना सांगितले.
सन 1990 ते सन 2019 असे सलग सहा वेळा निवडून येऊन विष्णु सवरा यांनी 30 वर्षे ग्रामीण भागाचे प्रतिनिधित्व केले होते. सातत्याने सहा वेळा निवडून येण्याचा त्यांनी विक्रम केला होता. त्यांच्या अंत्ययात्रेला विरोधी पक्षनेते देवेंद्र फडणवीस, माजी मंत्री सर्वश्री जगन्नाथ पाटील, रविंद्र चव्हाण, मधुकर पिचड, योगेश सागर, संघटन मंत्री विजय पुराणिक, सर्वश्री आमदार सुनील भुसारा, निरंजन डावखरे, राजेश पाटील, श्रीनिवास वनगा, शांताराम मोरे, कुणबी सेनाप्रमुख विश्वनाथ पाटील, खासदार कपिल पाटील, जिल्हा परिषद उपाध्यक्ष निलेश सांबरे आदी मान्यवरांसह मोठ्या संख्येने जनसमुदाय उपस्थित होता.
