◾ बोईसर स्थानिक गुन्हे शाखेच्या टिमने मिर्जापुर युपी येथून आरोपीला घेतले ताब्यात
पालघर दर्पण: विशेष प्रतिनिधी
बोईसर: पालघर तालुक्यातील पास्थळ ग्रामपंचायत हद्दीत असलेल्या छाया निवास येथे एका सदनिकेत दोन महिलांचा मृतदेह आढळून आले होते. दोन महिलांची हत्या करून युपी मध्ये पळ काढलेल्या मुख्य आरोपीला युपी मिर्जापुर मधुन ताब्यात घेण्यात आले असून बोईसर स्थानिक गुन्हे शाखेच्या टिमने ही कामगिरी केली आहे. या आरोपीला बोईसर मध्ये आणले जात असुन खुनाचे नेमके कारण स्पष्ट होणार आहे.
तारापूर पोलीस ठाणे हद्दीत असलेल्या पास्थळ येथील छाया निवास रहिवासी संकुलात एक महिला वय वर्षे 48 व तिची मुलगी वय वर्षे 20 आपल्या दुसऱ्या पती सोबत राहत होती. 11 डिसेंबर रोजी या दोघांचे मृतदेह बंद घरात सडलेल्या अवस्थेत सापडले होते. इमारतीच्या सिसीटिव्ही कँमेरा नुसार 6 डिसेंबर 2020 रोजी घटना घडली असल्याचा अंदाज वर्तवला जात होता. त्यानुसार मयत महिलेच्या पतीवर संशय व्यक्त केला जात होता. तपासादरम्यान पोलिसांना काही कागदपत्रे मिळाल्यानंतर मयत महिलेचा पती खोटी कागदपत्रे बनवून याठिकाणी वावरत असल्याचे समोर आले होते. आपले आडनाव पवार सांंगत असलेला इसम मुळचा युपीचा असल्याचे धक्कादायक वास्तव समोर आले. यातच मयत महिलेच्या मुलाकडून मिळालेली माहिती या सर्वांचा तपास केल्यानंतर बोईसर स्थानिक गुन्हे शाखेची टिम मिर्जापुर युपी येथे आरोपीच्या शोधत गेली होती.
बोईसर स्थानिक गुन्हे शाखेच्या टिमने मिर्जापुर युपी येथून आरोपीला ताब्यात घेतले असून आरोपीला युपीवरून आणले जात आहे. महिलांचे सापडलेले मृतदेह त्यानंतर आठवडा भरातच खुनाचा उलघडा झाला असून आरोपींच्या मुसक्या आवळण्यात स्थानिक गुन्हे शाखेला यश आले आहे. याबाबत अधिक माहिती मिळू शकली नसून नेमके खुनाचे कारण काय अशा अनेक गोष्टींचा उलघडा आरोपीला घेवून येणारी टीम बोईसर मध्ये दाखल झाल्यानंतर होणार आहे.
