वसईच्या पाचूबंदर येथील धक्कादायक घटना
पालघर दर्पण, वार्ताहर
नालासोपारा : वसईच्या पाचूबंदर येथे राहणाऱ्या आईनेच एका दीड महिन्याच्या मुलीची हत्या केल्याची धक्कादायक घटना बुधवारी दुपारी घडली आहे. घराच्या पाण्याच्या टाकीत बुडवून पोटच्या पोरीचीच आईने हत्या केली असून तिचा मृतदेह घरात असलेल्या पाण्याच्या टाकीमध्ये सापडला आहे. वसई पोलिसांनी मृतदेह ताब्यात घेऊन शवविच्छेदनसाठी पाठवला आहे. पोलिसांनी आरोपी महिले विरोधात गुन्हा दाखल करून आरोपी आईला अटक केली आहे.
मिळालेल्या माहितीनुसार वसईच्या पाचूबंदर येथे दीड महिन्याच्या मुलीचा बुधवारी दुपारी पावणे बाराच्या सुमारास पाण्याच्या टाकीमध्ये मृतदेह मिळाल्याने संपूर्ण परिसरात खळबळ माजलीे. आरोपी महिलेच्या घरातल्या व आजूबाजूला राहणाऱ्या लोकांनी दीड महिन्याची मुलगी सकाळपासून सापडली नसल्याने सर्वत्र शोधाशोध करत होते. काही जण तर तिचे अपहरण झाले असेल असे बोलून पोलिसांना तक्रार करायला घरच्यांना सांगत होते. आरोपी महिलेची सासू वसई पोलीस ठाण्यात तक्रार करायला आल्यावर एक निनावी फोन आला की तिचा मृतदेह पाण्याच्या टाकीत सापडला आहे. घरातले व वसई पोलिसांनी घटनास्थळी धाव घेऊन मुलीचा मृतदेह ताब्यात घेतला.
पाचूबंदर येथील किनारा हॉटेलच्या पुढे इतुर परिवार राहतात. या परिवारात सासू, पती, दिर भावजय आणि निर्मला इतुर मुलांसह राहत होते. निर्मला यांचे पती व दिर मासेमारीसाठी बोटीवर जातात. निर्मला यांनी दीड महिन्यांपूर्वी दोन गोंडस जुळ्या मुलींना जन्म दिला होता. त्याच्या दिरालाही मुलीच होत्या. मुलगा झाला नाही म्हणून त्यांना त्रास दिला जायचा. जुळ्या मुली असल्याने एक मुलगी झोपायची तर एक जागी राहायची. शेवटी रोजच्या त्रासाला कंटाळून निर्मला यांनी एका मुलीला बुधवारी सकाळी 11:40 दरम्यान घरातील पाण्याच्या टाकीत टाकले. टाकीतील पाण्यात बुडून त्या चिमुकलीचा दुर्देवी मृत्यू झाला आहे.
