पालघर दर्पण, प्रतिनिधी
नालासोपारा : घराची अर्धवट भिंत कोसळून एका सात वर्षीय मुलाचा मृत्यू झाला असून दोन मुली गंभीर जखमी झाल्या आहेत. जखमींना स्थानिक रुग्णालयात दाखल करण्यात आले
विरार पूर्वेकडील खानिवडे भागातील हनुमान नगर परिसरात शुक्रवारी सकाळी ११:३० वाजण्याचा सुमारास घराच्या अर्धवट बांधकामाची भिंत कोसळली. यात घराच्या शेजारीच खेळणाऱ्या तीन लहान मुलांच्या अंगावर ही भिंत कोसळली. या घटनेत एका ७ वर्षीय लहान मृत्यू झाला असून दोन मुली गंभीर जखमी आहेत. खनिवडे येथील हनुमान नगर येथे राहणाऱ्या साहिल महेश वाघ(७), अंकिता वाघ(५) व निधी वाघ(५) हे शुक्रवारी घराच्या बांधकामाच्या अर्धवट भिंतीजवळ खेळत असताना घराची भिंत ही तिघांच्या अंगावर कोसळली यात महेश वाघ याचा जागीच मृत्यू झाला तर दोन्ही मुली गंभीर जखमी झाल्या आहेत.या प्रकरणी मांडवी पोलीस ठाण्यात नोंद करण्यात आली आहे. दोन भाऊ बहीण असलेले साहिल व अंकिता या चिमुकल्या मुलांच्या वडिलांचे तीन वर्षांपूर्वी निधन झाले आहे. आई मोलमजुरी करून कुटुंबाचा सांभाळ करते. त्यांच्यावर ओढवलेल्या या दुर्दैवी प्रसंगाने नवीन वर्षाच्या पहिल्याच दिवशी गावामध्ये शोककळा वातावरण निर्माण झाले आहे.
