■प्रेयसीची हत्या करून भिंतीत गाढुन ठेवला मृतदेह; शंका येऊ नये म्हणून मृतदेहासोबत वास्तव्य.
पालघर दर्पण : प्रतिनिधी
पालघर जिल्ह्यातील वाणगावमध्ये प्रियकराने आपल्या प्रेयसीची हत्या करून मृतदेह भिंतीत गाढून ठेवला असल्याची धक्कादायक घटना पालघरमध्ये घडली आहे. तरुणीची हत्या करणाऱ्या आरोपीला पोलिसांनी ताब्यात घेतले आहे.
वाणगाव मधील वृंदावन दर्शन या इमारतीच्या एका फ्लॅटमध्ये अमिता मोहिते या ३२ वर्षीय तरुणीचा मृतदेह भिंतीत गाढुन ठेवलेल्या अवस्थेत आढळून आला. या तरुणीची हत्या तिच्या प्रियकरानेच केली असल्याचे समोर आले. उमरोळी येथील प्रेमी युगुल लग्न करण्यासाठी घरातून पळून वाणगाव येथे वृंदावन दर्शन ईमारतीमध्ये रहायला गेले होते. त्याच रात्री अमिताने लग्नाचा तगादा लावल्याने त्यांच्यात भांडण झाले. प्रियकराला राग आल्याने त्याने आपल्या प्रेयसीचा गळा दाबून हत्या केली. तसेच गुन्हा लपविण्यासाठी त्याने मृतदेह स्वतः रहात असलेल्या फ्लॅट मध्ये गाढुन ठेवला.
कोणाला शंका येऊ नये म्हणून ४ महिन्यांपूर्वी तरुणीचा मृतदेह गाढुन ठवेलेल्या घरात आरोपी स्वतः देखील राहिला. या ४ महिन्यांच्या कालावधीत आरोपी आपल्या मृत प्रेयसीच्या व्हॉट्सअप या सोशल मीडियाचा वापरून घरच्यांशी त्यांची मुलगीच आहे असे भासवून संपर्क साधत होता. मात्र तरुणीच्या कुटुंबियांना शंका असली असल्याने त्यांनी बोईसर पोलिस ठाण्यात तक्रार नोंदवली. पोलिसांनी तपास केला असता ही धक्कादायक घटना समोर आली. आरोपीने तरुणीची हत्या केली असल्याची कबुली दिली आहे. या प्रकरणी या आरोपीला ताब्यात घेतले असून अधिक तपास सुरू आहे.
