पालघर दर्पण , प्रतिनिधी
पालघर : एकात्मिक आदिवासी विकास प्रकल्प डहाणू जि-पालघर अधीनस्त वसई, पालघर, डहाणू व तलासरी तालुक्यातील प्रकल्प कार्यालयात नोंदणीकृत अनुसूचित जमातीच्या सुशिक्षित बेरोजगार युवक व युवतींसाठी डहाणू येथे स्पर्धापरिक्षा, रोजगार व स्वयंरोजगार मार्गदर्शन महामेळाव्याचे आयोजन करण्यात आले आहे.
शुक्रवार दिनांक २६ फेब्रुवारी रोजी सकाळी १०.०० ते ६.०० वा. पर्यंत डहाणू नगरपरिषदेच्या बी.एस.ई.एस. हॉल, अदानी गेट, डहाणू जि-पालघर प्रकल्प कार्यालय डहाणू येथे या महामेळाव्याचे आयोजन केले आहे. सेवायोजन विभागात नोंदणीकृत असलेल्या अनसूचित जमातीच्या इ. १० वी पास व नापास, १२ वी पास तसेच नापास, डिप्लोमा, आयटीआय, बीएड, डीएड, कृषि पदवी व पदविकाधारक, कौशल्य विकास, बॅकिंग क्षेत्रात नोकरी तसेच स्वयंरोजगार करण्यास इच्छूक उमेदवारांना मार्गदर्शन महामेळाव्याचे आयोजन करण्यात आले आहे महामेळाव्यासाठी प्रकल्प अधिकारी डहाणू, कामगार कल्याण विभाग, जिल्हा कौशल्य विकास अधिकारी, एलटीआय, एलआयसी, केविके या विभागाचे तज्ज्ञ तसेच विविध कंपन्याचे प्रतिनिधी उपस्थित राहून मार्गदर्शन करणार आहेत. तरी या रोजगार व स्वयंरोजगार मार्गदर्शन महामेळाव्यास नोंदणीकृत अनुसूचित जमातीच्या युवक-युवतींनी आवर्जून उपस्थित रहावे असे आवाहन डहाणूच्या प्रकल्प अधिकारी आशिमा मित्तल यांनी केले आहे. युवक-युवर्तींनी मार्गदर्शन महामेळाव्यास येताना मास्क वापरणे बंधनकारक आहे तसेच आपला बायोडाटा आणि शैक्षणिक कागदपत्रांच्या छायांकित प्रती सोबत घेवून याव्यात.
