■ भाजपा देशात जातीयद्वेषाचं विष पसरवत आहे; शरद पवार
पालघर दर्पण, प्रतिनिधी
काल राष्ट्रवादी काँग्रेसचे प्रवक्ते नवाब मलिक यांनी मोदींच्या सगळीकडे सततच्या दिसणाऱ्या फोटो आणि बॅनरबाजीमुळे मोदींवर टीका केली होती. व नोटेवरून महात्मा गांधीजी यांचा फोटो काढून मोदी स्वतःचा फोटो छापतील असे बोलून मोदींवर निशाणा साधला होता. तर आज राष्ट्रवादी काँग्रेसचे अध्यक्ष शरद पवार यांनी देखील पंतप्रधान नरेंद्र मोदी यांच्यावर टीका केल्या आहेत. भाजप देशात जातीयद्वेषाच विष पसरवत आहे. असे पवारांनी विधान केले आहे.
रविवारी रांची येथील हरमु मैदानात राष्ट्रवादी काँग्रेस पार्टीची सभा आयोजित केली गेली. त्या सभेत शरद पवार यांनी मोदींवर जोरदार टीका केल्या. शेतकऱ्यांना आंदोलन करून १०० दिवसांपेक्षाही जास्त दिवस झाले असून देखीलही पंतप्रधान शेतकऱ्यांना भेटले नाही. पंतप्रधान यांना कोलकाता येथे जाण्यास तसेच पश्चिम बंगाल सरकारविरोधात रॅली काढण्यात वेळ आहे. मात्र १०० किलोमीटर असलेल्या शेतकऱ्यांना भेटण्यास वेळ नाही असे पवार म्हणाले. त्याचबरोबर बंधुभाव प्रस्थापित करणे ही केंद्राची जबाबदारी आहे. परंतु भाजप सत्तेत आल्यापासून भाजप देशात जातीयद्वेषाच विष पसरवत आहे. असे विधान देखील पवारांनी आपल्या वक्तव्यात केले.
