◾ बोईसर ओस्तवाल येथील अल्युर सलाँन या सलून मधील घटना; शटर बंद करून सलून मध्ये जनरेटर सुरू केल्याने घडला प्रकार
पालघर दर्पण: हेमेंद्र पाटील
बोईसर: करोनाच्या निर्बंधामुळे शासनाने कागदोपत्री जरी सलून दुकाने बंद ठेवली असली तरी बोईसर मध्ये शटर खालती करून छुप्या पध्दतीने सलून सुरू असल्याचे उघड झाले आहे. बोईसर ओस्तवाल येथील एका सलून छुप्या पध्दतीने शटर खाली करून सलून सुरू ठेवण्यात आले होते. यावेळी ओस्तवाल भागात विद्युतपुरवठा खंडित असल्याने सलून मालकांनी जनरेटर हे शटर बंद खोलीतच सुरू ठेवल्याचे श्वास गुदमरून सलून मालका सह कर्मचारी व ग्राहक असे चार लोक बेशुद्ध पडल्यावर हा प्रकार उघडकीस आला.
बोईसर येथील ओस्तवाल भागात असलेल्या अल्युर सलाँन या सलून व स्प्रा सेंटर शुक्रवारी छुप्या पध्दतीने सुरू केल्याचे उघड झाले. याठिकाणी सलूनचे शटर बंद करून आत मध्ये जनरेटर सुरू करून सलून चालवले जात होते. ओस्तवाल भागातील विद्युतपुरवठा खंडित झाल्याने सलून मालकांनी शटरच्या मध्ये बंद खोलीतच जनरेटर सुरू केले. यावेळी एक महिला ग्राहक देखील याठिकाणी उपस्थित होती. याठिकाणी छुप्या पध्दतीने सुरू असलेल्या सलून च्या बाहेर एक इसम कोणी येते का हे बघण्यासाठी ठेवला गेला होता. जनरेटर मधून निघणारा कार्बनडाय आँक्साईड मुळे श्वास गुदमरून गेल्याने सर्व बेशुद्ध झाले होते. सलून मध्ये बेशुद्ध पडलेल्या सलून मालक धनश्री संखे(35), युसुब शेख (25), योगिता वेलवणकर(23) व प्रभा (38) अशा तिन स्त्री व एका पुरूषांवर बोईसर येथील खाजगी रुग्णालयात अतिदक्षता विभागात उपचार सुरू आहेत.
◾बेकायदेशीर पणे सुरू असलेल्या सलून मध्ये घडलेल्या प्रकाराबाबत बोईसर पोलिसांना विचारणा केली असता चौकशी सुरू असल्याचे सांगितले आहे. संचारबंदी असताना सलून सुरू ठेवल्याने अशा प्रकारे नियम धुडकावून काम करणाऱ्या सलूनवर पोलीस काय कारवाई करतात याकडे लक्ष लागले आहे.
◾ बोईसर भागात बंद असलेल्या सलूनच्या शटर बाहेर एक इसम उभा राहत असून ग्राहक आल्यावर त्याला मध्ये पाठवले जात असल्याचे समोर आले आहे. यातच काही बड्या सलून मध्ये मोबाईल वरून वेळ घेवून सलून मध्ये बोलवले जाते. बोईसर तारापूर रस्त्यावर असलेल्या अशाच एका मोठ्या सलून मध्ये देखील बंद शटर खाली सर्व सुरू असते. मात्र याठिकाणी प्रशासन देखील दुर्लक्ष करत असल्याचे अशा घटना घडल्यानंतर दिसून येते.
