अन्य गटांतील भाजपाच्या उमेदवारांवर होणार परिणाम
राजतंत्र: वार्ताहर
वाडा: जिल्हा परिषद पोटनिवडणुकीचा प्रचार अंतिम टप्प्यात आलेला असतानाच वाडा तालुक्यातील गारगांव या जिल्हा परिषद गटाच्या उमेदवार करुणा किशोर वेखंडे यांनी निवडणुकीच्या आदल्याच दिवशी आपल्या कुटुंबातील सर्व सदस्यांसह शिवसेनेत प्रवेश केला. या प्रकारामुळे भाजपाच्या गोटात कमालीची अस्वस्थता माजली आहे.
गारगांव गट हा राष्ट्रवादी काँग्रेसचा बालेकिल्ला म्हणून ओळखला जातो. वर्षभरापूर्वी झालेल्या जिल्हा परिषद निवडणुकीत या गटातून राष्ट्रवादीचा उमेदवार मोठ्या मताधिक्याने निवडून आला होता. या गटांतर्गत येत असलेल्या पंचायत समितीच्या दोन्ही गणांमध्ये गत निवडणुकीत राष्ट्रवादी काँग्रेसचेच उमेदवार निवडून आले आहेत.
निवडणुकीचा उमेदवारी अर्ज दाखल केल्यपासुन पक्षाकडून तसेच भारतीय जनता पक्षाच्या प्रमुख कार्यकर्त्यांकडून अजिबात सहकार्य मिळत नसल्याने आपण भाजपा पक्षाचा राजीनामा देऊन पत्नीसह शिवसेनेत प्रवेश केला असल्याचे उमेदवाराचे पती किशोर वेखंडे यांनी सांगितले.
दरम्यान मतदानाच्या आदल्याच दिवशी भाजपाच्या अधिकृत उमेदवारांनी शिवसेनेत प्रवेश केल्याने संपूर्ण तालुक्यात खळबळ उडाली आहे. या प्रकारामुळे वाडा तालुक्यातील भाजपाच्या अन्य गटांतील जागाही धोक्यात आल्या आहेत.
